काठमाण्डौ
पछिल्लो राजनीतिक तथा समसामयिक घटनाक्रममा सत्तारुढ दल नेपाल कम्युनिस्ट पार्टी (नेकपा) भित्र विवाद चुलिएर विवादमा फस्दै जाँदा विपक्षीहरुबीच भने मोर्चा कस्दै लैजाने सहमति भएको छ ।
पछिल्लो राजनीतिक तथा समसामयिक घटनाक्रमका विषयमा मङ्गलबार प्रमुख प्रतिपक्षी दल नेपाली काँग्रेस र नवगठित जनता समाजवादी पार्टीबीच छलफल भएको छ ।
मंगलबार कांग्रेस सभापति शेरबहादुर देउवाको निवासमा भएको छलफलमा काँग्रेसबाट सभापति देउवा, वरिष्ठ नेता रामचन्द्र पौडेल, उसभापति निधि, नेता कृष्णप्रसाद सिटौला र जसपाबाट अध्यक्ष महन्थ ठाकुर, उपेन्द्र यादव, वरिष्ठ नेता डा. बाबुराम भट्टराई, राजेन्द्र महतो र अशोक राईको सहभागिता थियो ।
छलफलबाट एक्कासी सभामुख र संसदमा रहेका राजनीतिक दलहरुको परामर्शविपरीत असार १८ गते बजेट संसद् अधिवेशन अन्त्य गर्ने प्रधानमन्त्री केपी शर्मा ओलीको कदमको विरोधमा काँग्रेस र जसपा एक ठाउँमा उभिने निष्कर्ष निकालेका हुन् ।
कोरोना, सलह, बाढी, पहिरोबाट सिर्जित चुनौती सामना गर्न प्रस्तुत सङ्कल्प प्रस्ताव, एमसीसी, नागरिकता विधेयक, निजामती कर्मचारीको सेवा शर्तसम्बन्धी विधेयक र नेपाल विशेष सेवा विधेयकबारे निश्चित टुङ्गोमा नपुगी अधिवेशन अन्त्य गरिएको जस्ता विषयमा काँग्रेस जसपाबीच छलफल भएको थियो ।
तर सरकारको कदमको विरोध गरेको काँग्रेस र जसपाबीचको बैठकले आफूले चाल्ने कदमबारे भने निर्णय नलिएको र केही दिनमा अर्को बैठक बस्ने कांग्रेसका उपसभापति निधिको भनाइ छ ।
समाजवादीका वरिष्ठ नेता राजेन्द्र महतोका अनुसार छलफलमा पछिल्लो राजनीतिक परिस्थितिबारे समीक्षा भएको थियो ।
सरकारका कारण सबै क्षेत्र डामाडोल हुने अवस्थामा पुगेको छलफलको निष्कर्ष रहेको उनले बताएका छन् ।
क्याटेगोरी : राजनीति, समाचार
ट्याग : #breaking
तपाईको कमेन्ट लेख्नुहोस्